متن و پخش آهنگ حیدر بابا از شهریار

متن کامل ترانه حیدر بابا با صدای شهریار

حیدربابا ، ایلدیریملار شاخاندا سئللر ، سولار ، شاققیلدییوب آخاندا قیزلار اوْنا صف باغلییوب باخاندا سلام اولسون شوْکتوْزه ، ائلوْزه ! منیم دا بیر آدیم گلسین دیلوْزه حیدربابا ، کهلیک لروْن اوچاندا کوْل دیبینن دوْشان قالخوب ، قاچاندا باخچالارون چیچکلنوْب ، آچاندا بیزدن ده بیر موْمکوْن اوْلسا یاد ائله آچیلمیان اوْرکلری شاد ائله بایرام یئلی چارداخلاری ییخاندا نوْروز گوْلی ، قارچیچکی ، چیخاندا آغ بولوتلار کوینکلرین سیخاندا بیزدن ده بیر یاد ائلییه ن ساغ اوْلسون دردلریمیز قوْی دیکلسین ، داغ اوْلسون حیدربابا ، گوْن دالووی داغلاسین ! اوْزوْن گوْلسوْن ، بولاخلارون آغلاسین ! اوشاخلارون بیر دسته گوْل باغلاسین ! یئل گلنده ، وئر گتیرسین بویانا بلکه منیم یاتمیش بختیم اوْیانا حیدربابا ،‌ سنوْن اوْزوْن آغ اوْلسون ! دورت بیر یانون بولاغ اوْلسون باغ اوْلسون ! بیزدن سوْرا سنوْن باشون ساغ اوْلسون ! دوْنیا قضوْ-قدر ، اولوْم-ایتیمدی دوْنیا بوْیی اوْغولسوزدی ، یئتیمدی حیدربابا ، یوْلوم سنن کج اوْلدی عومروْم کئچدی ، گلممه دیم ، گئج اوْلدی هئچ بیلمه دیم گوزللروْن نئج اوْلدی بیلمزیدیم دونگه لر وار ،‌ دونوْم وار ایتگین لیک وار ، آیریلیق وار ، اوْلوْم وار حیدربابا ، ایگیت امک ایتیرمز عوموْر کئچر ، افسوس بره بیتیرمز نامرد اوْلان عومری باشا یئتیرمز بیزد ، واللاه ، اونوتماریق سیزلری گورنمسک حلال ائدوْن بیزلری حیدربابا ، میراژدر سسلننده کند ایچینه سسدن – کوْیدن دوْشنده عاشیق رستم سازین دیللندیرنده یادوندادی نه هولسک قاچاردیم قوشلار تکین قاناد آچیب اوچاردیم شنگیل آوا یوردی ، عاشیق آلماسی گاهدان گئدوب ، اوْردا قوْناق قالماسی داش آتماسی ، آلما ،‌ هیوا سالماسی قالیب شیرین یوخی کیمین یادیمدا اثر قویوب روحومدا ، هر زادیمدا حیدربابا ، قوری گولوْن قازلاری گدیکلرین سازاخ چالان سازلاری کت کوشنین پاییزلاری ، یازلاری بیر سینما پرده سی دیر گوزوْمده تک اوْتوروب ، سئیر ائده رم اوزوْمده حیدربابا ،‌ قره چمن جاداسی چْووشلارین گلر سسی ، صداسی کربلیا گئدنلرین قاداسی دوْشسون بو آج یوْلسوزلارین گوزوْنه تمدونون اویدوخ یالان سوزوْنه حیدربابا ، شیطان بیزی آزدیریب محبتی اوْرکلردن قازدیریب قره گوْنوْن سرنوشتین یازدیریب سالیب خلقی بیر-بیرینن جانینا باریشیغی بلشدیریب قانینا گوز یاشینا باخان اوْلسا ، قان آخماز انسان اوْلان بئلینه تاخماز آمما حئییف کوْر توتدوغون بوراخماز بهشتیمیز جهنم اوْلماقدادیر ! ذی حجه میز محرم اوْلماقدادیر ! خزان یئلی یارپاخلاری توکنده بولوت داغدان یئنیب ، کنده چوکنده شیخ الاسلام گوزل سسین چکنده نیسگیللی سوز اوْرکلره دیردی آغاشلار دا آللاها باش ایردی داشلی بولاخ داش-قومونان دوْلماسین ! باخچالاری سارالماسین ، سوْلماسین ! اوْردان کئچن آتلی سوسوز اولماسین ! دینه : بولاخ ، خیرون اوْلسون آخارسان افقلره خمار-خمار باخارسان حیدر بابا ، داغین ، داشین ، سره سی کهلیک اوْخور ، دالیسیندا فره سی قوزولارین آغی ، بوْزی ، قره سی بیر گئدیدیم داغ-دره لر اوزونی اوْخویئدیم‌ : « چوْبان ، قیتر قوزونی » حیدر بابا ، سولی یئرین دوْزوْنده بولاخ قئنیر چای چمنین گوزونده بولاغ اوْتی اوْزر سویون اوْزوْنده گوزل قوشلار اوْردان گلیب ، گئچللر خلوتلیوْب ، بولاخدان سو ایچللر بیچین اوْستی ، سونبول بیچن اوْراخلار ایله بیل کی ، زوْلفی دارار داراخلار شکارچیلار بیلدیرچینی سوْراخلار بیچین چیلر آیرانلارین ایچللر بیرهوشلانیب ، سوْننان دوروب ، بیچللر حیدربابا ، کندین گوْنی باتاندا اوشاقلارون شامین ئییوب ، یاتاندا آی بولوتدان چیخوب ، قاش-گوز آتاندا بیزدن ده بیر سن اوْنلارا قصه ده قصه میزده چوخلی غم و غصه ده قاری ننه گئجه ناغیل دیینده کوْلک قالخیب ، قاپ-باجانی دوینده قورد گئچینین شنگوْلوْسون یینده من قاییدیب ، بیرده اوشاق اوْلئیدیم بیر گوْل آچیب ، اوْندان سوْرا سوْلئیدیم عمه جانین بال بلله سین ییه ردیم سوْننان دوروب ، اوْس دوْنومی گییه ردیم باخچالاردا تیرینگنی دییه ردیم آی اوزومی اوْ ازدیرن گوْنلریم ! آغاج مینیپ ، آت گزدیرن گوْنلریم ! هچی خالا چایدا پالتار یوواردی ممد صادق داملارینی سوواردی هئچ بیلمزدیک داغدی ، داشدی ، دوواردی هریان گلدی شیلاغ آتیب ، آشاردیق آللاه ، نه خوْش غمسیز-غمسیز یاشاردیق شیخ الاسلام مناجاتی دییه ردی مشدرحیم لباده نی گییه ردی مشْدآجلی بوْز باشلاری ییه ردی بیز خوْشودوق خیرات اوْلسون ، توْی اوْلسون فرق ائلمز ، هر نوْلاجاق ، قوْی اولسون ملک نیاز ورندیلین سالاردی آتین چاپوپ قئیقاجیدان چالاردی قیرقی تکین گدیک باشین آلاردی دوْلائیا قیزلار آچیپ پنجره پنجره لرده نه گوزل منظره ! حیدربابا ، کندین توْیون توتاندا قیز-گلینلر ، حنا-پیلته ساتاندا بیگ گلینه دامنان آلما آتاندا منیم ده اوْ قیزلاروندا گوزوم وار عاشیقلارین سازلاریندا سوزوم وار حیدربابا ، بولاخلارین یارپیزی بوْستانلارین گوْل بسری ، قارپیزی چرچیلرین آغ ناباتی ، ساققیزی ایندی ده وار داماغیمدا ، داد وئرر ایتگین گئدن گوْنلریمدن یاد وئرر بایرامیدی ، گئجه قوشی اوخوردی آداخلی قیز ، بیگ جوْرابی توْخوردی هرکس شالین بیر باجادان سوْخوردی آی نه گوزل قایدادی شال ساللاماق ! بیگ شالینا بایراملیغین باغلاماق ! شال ایسته دیم منده ائوده آغلادیم بیر شال آلیب ، تئز بئلیمه باغلادیم غلام گیله قاشدیم ، شالی ساللادیم فاطمه خالا منه جوراب باغلادی خان ننه می یادا سالیب ، آغلادی حیدربابا ، میرزممدین باخچاسی باخچالارین تورشا-شیرین آلچاسی گلینلرین دوْزمه لری ، طاخچاسی هی دوْزوْلر گوزلریمین رفینده خیمه وورار خاطره لر صفینده بایرام اوْلوب ، قیزیل پالچیق ازللر ناققیش ووروب ، اوتاقلاری بزللر طاخچالارا دوْزمه لری دوْزللر قیز-گلینین فندقچاسی ، حناسی هوسله نر آناسی ، قایناناسی باکی چی نین سوزی ، سوْوی ، کاغیذی اینکلرین بولاماسی ، آغوزی چرشنبه نین گیردکانی ، مویزی قیزلار دییه ر : « آتیل ماتیل چرشنبه آینا تکین بختیم آچیل چرشنبه » یومورتانی گویچک ، گوللی بوْیاردیق چاققیشدیریب ، سینانلارین سوْیاردیق اوْیناماقدان بیرجه مگر دوْیاردیق ؟ علی منه یاشیل آشیق وئرردی ارضا منه نوروزگوْلی درردی نوْروز علی خرمنده ول سوْرردی گاهدان یئنوب ، کوْلشلری کوْرردی داغدان دا بیر چوْبان ایتی هوْرردی اوندا ، گوردن ، اولاخ ایاخ ساخلادی داغا باخیب ، قولاخلارین شاخلادی آخشام باشی ناخیرینان گلنده قوْدوخلاری چکیب ، وورادیق بنده ناخیر گئچیب ، گئدیب ، یئتنده کنده حیوانلاری چیلپاق مینیب ، قوْواردیق سوز چیخسایدی ، سینه گریب ، سوْواردیق یاز گئجه سی چایدا سولار شاریلدار داش-قیه لر سئلده آشیب خاریلدار قارانلیقدا قوردون گوزی پاریلدار ایتر ، گوردوْن ، قوردی سئچیب ، اولاشدی قورددا ، گوردوْن ، قالخیب ، گدیکدن آشدی قیش گئجه سی طوله لرین اوْتاغی کتلیلرین اوْتوراغی ، یاتاغی بوخاریدا یانار اوْتون یاناغی شبچره سی ، گیردکانی ، ایده سی کنده باسار گوْلوْب – دانیشماق سسی شجاع خال اوْغلونون باکی سوْقتی دامدا قوران سماواری ، صحبتی یادیمدادی شسلی قدی ، قامتی جونممه گین توْیی دوندی ، یاس اوْلدی ننه قیزین بخت آیناسی کاس اوْلدی حیدربابا ، ننه قیزین گوزلری رخشنده نین شیرین-شیرین سوزلری ترکی دئدیم اوْخوسونلار اوزلری بیلسینلر کی ، آدام گئدر ، آد قالار یاخشی-پیسدن آغیزدا بیر داد قالار یاز قاباغی گوْن گوْنئیی دوینده کند اوشاغی قار گوْلله سین سوینده کوْرکچی لر داغدا کوْرک زوْینده منیم روحوم ، ایله بیلوْن اوْردادور کهلیک کیمین باتیب ، قالیب ، قاردادور قاری ننه اوزاداندا ایشینی گوْن بولوتدا اییرردی تشینی قورد قوْجالیب ، چکدیرنده دیشینی سوْری قالخیب ، دوْلائیدان آشاردی بایدالارین سوْتی آشیب ، داشاردی خجه سلطان عمه دیشین قیساردی ملا باقر عم اوغلی تئز میساردی تندیر یانیب ، توْسسی ائوی باساردی چایدانیمیز ارسین اوْسته قایناردی قوْورقامیز ساج ایچینده اوْیناردی بوْستان پوْزوب ، گتیرردیک آشاغی دوْلدوریردیق ائوده تاختا-طاباغی تندیرلرده پیشیرردیک قاباغی اوزوْن ئییوْب ، توخوملارین چیتداردیق چوْخ یئمکدن ، لاپ آز قالا چاتداردیق ورزغان نان آرموت ساتان گلنده اوشاقلارین سسی دوْشردی کنده بیزده بویاننان ائشیدیب ، بیلنده شیللاق آتیب ، بیر قیشقریق سالاردیق بوغدا وئریب ، آرموتلاردان آلاردیق میرزاتاغی نان گئجه گئتدیک چایا من باخیرام سئلده بوْغولموش آیا بیردن ایشیق دوْشدی اوْتای باخچایا ای وای دئدیک قورددی ، قئیتدیک قاشدیق هئچ بیلمه دیک نه وقت کوْللوکدن آشدیق حیدربابا ، آغاجلارون اوجالدی آمما حئییف ، جوانلارون قوْجالدی